السلام عليكم ورحمة الله وبركاته

 

أماااااا عاد ما قلت لكم السالفة للحين ؟؟!!! .. أوك مهيب مشكلة ذكروني بعدين <<– أعتقد وضح لكم أني ما فضيت اكتب مقدمة , لذا سلكو

 

الوقت :

الثانية عشر ظهراً , أم أنها كانت الساعة الواحده يا ترى  .. استغفر الله ما اتذكر زين  .. عموماً ما عليه إذا تذكرت قلت لكم

اليوم :

الأثنين .. وش فيكم تناظروني كذا ؟ جد كان يوم الاثنين , صدقوني وقسم .. اممم أو كانت السالفة يوم الثلاثاء ؟!

الموقع :
 غرفتي , عاد هالنقطة متأكد منها لحظه لحظة , تصدقون الظاهر إني كنت نايم في الملحق

<<– وش هالموضوع اللي من أوله حواق وتظليل في الحقائق

 

 

تششششششييييييييييييين <<– صوت المكنسة , شغالتنا جالسه تكنس الصالة ..  تباً لم أستطع النوم بسبب إزعاج  تلك الشمطاء , وضعت ما أستطيع وضعه في أذاني كي أخفف صوت تلك الضوضاء .. جربت وضع المناديل ثم القطن ثم حين احتدم الأمر وضعت مفرش سريري وقطعة صغيرة من ستارة غرفتي ( ما قلت الستارة كلها عشان تصدقون بس ) ولكن لا حياة لمن تنادي

 

توقف الإزعاج للحظات وقبل أن أهنئ بالنوم رن هاتفي الخليوي فإذا به صديقي ملاح السراب , سألني : فاضي اليوم نشوفك ؟ .. قلت له : مدري الصراحة , نقول إن شاء الله .. قال لي : لا تكفى علمني الحين ضروري عشان أكلم العيال وأناديهم يجون وإذا منتب جاي نكنسل بس .. لا أخفيكم حقيقةً بأنني خقيت وأحسست بأنني مهم جداً .. لذا وافقت على طول .. وفجأةً .. تشششششييين تششششييين تتتششششييين <<– رجعت تكنس مرة ثانية .. ولا بعد هالمرة جالسة تكنس إللي تحت الكنبات

في المساء , اتصلت به باكراً وقلت له : ها جاك أحد ؟ .. رد علي بتأفف  : كلمتهم وقالوا بيتأخرون الزلايب  .. تبسمت وقلت: أجل افتح تراني أنا عند الباب , عشان تعرف أني نموذج للصديق إللي يجي بدري .. تلعثم قليلاً وحين فتح الباب وجدت جميع أصدقائي بالداخل يعملون على حفلة مفاجأة لي بمناسبة التخرج .. على الفور تغيرت ملامح وجهي وقلت : وأنا أقول ليه قلت لي أني إذا ما جيت ما راح تتصل على أحد .. يلعن إبليسك ما أمداني أفرح <<– هذا اللي همه

 

دعونا نبحر قليلاً مع بعض الصور التي التقطها المصور المبدع ولاعة

 

 

وش تبي ذي الصورة هنا الحين ؟ .. اي صح السلحفات ذي لقينها موجودة في الملحق والصراحة ما ندري هي لمين .. لذا همتكم معنا يا أخوان نبي نلقى صاحبها أو على الأقل واحد منكم يتبناها .. تراها مؤدبة وترتب غرفتها وتعرف تتكلم لغتين غير العربية <<– يبي يمشي سوقها

جهه بسيطة من الملحق الذي تم الاحتفال فيه .. أحب أقول لكم معلومة بسيطة عن الملحق , وهي ان طوله إحد عشر متر وعرضه مترين .. عشان كذا أي واحد بيجلس فيه بيحس إنه جالس في باص النقل الجماعي .. كان ودي أقول لهم خلونا نوقف جمب بعض ونسوي صورة جماعية في نهاية الحفلة بس خفت يصير ما نقصنا الا كورة عشان نصير لاعبين كورة قدم واقفين في ملعب على ذا الملحق المستطيل

رسمة عبد الرحمن السراب للشعار <<– ملاح , أعتقد أني قلت لك قبل أن أخوك ماله يوزر ؟ .. حلو أجل بس حبيت أذكرك

 

 

( اضغط على الصورة لرؤيتها بحجمها الطبيعي )

هذي الصحيفة رسمها ابن خالتي البار شطيط .. طبعاً على ما فهمت منه أن محتوى الرسمة هو : حبل وفيه فيونكة وجمبها مقص ويقول قص الشريط .. لكني أول ماشفتها ما حسيت كذا أبد .. مدري ليه أول شيء جاء في بالي هو محل نعومي .. وتأكدت من احساسي ذا من بعد ما شفته كاتب تحت اسم الموظف اللبناني ( شصيط ) 

 

للمعلومية بس .. تراهم يعانون شطيط بكلمة ( يا زلابة ) <<– تمويه فاشل

 

طبعاً ما يحتاج أبين لكم أن هم هنا يعانوني أنا <<– لا ياشيخ

 

 

أنواع اللحسة .. اللي بالعربي مكتوب بالأنجليزي والعكس , ياااي خربوا ثقافتي  .. أهم شيء شوفوا شخاميط ولاعة البثر

 

يا أخوان أتمنى محد  يتحمس ويطبع الموضوع عشان يجلس يشخمط على هالصورة ويلعب بها لعبة ( حاول أن تصل إلى النهاية )  .. ولو سوى كذا فياليت يتابع الموضوع الجاي لأن حل المسابقة سيكون في العدد القادم

 

شاطر يا ولد .. بتأخذ عشرة من عشرة في المشاركة

 

طبعاً ما يحتاج أقول لكم أنهم يكلمون شطيط هنا برضو ( لا زال التمويه الفاشل مستمر ) .. وما يحتاج أنبهكم على بثارة ولاعة وحبه للظهور أمام الأضواء .. الله يرجه غطى على الفريان

 

مهوب كأنه سيب مدرسة ذا وإلا يتهيأ لي ؟!

 

 

( اضغط على الصورة لرؤيتها بحجمها الطبيعي ) 

سجل الذكريات ,  أحس هالصحيفة كرهت عمرها .. ما بقى أحد ما شخمط عليها 

اضطريت أعيد كتابة بعض الكلام الغير واضح بسبب التصوير

 

 

عرق الأثلة :

ألف مبروك

أفتتحت عام 2010 بنجاح ساحق سوف يذكرة الأجداد قبل الأحفاد

استمر في العطاء وصف الحروف , المحب عرق الأثلة

للمراسلة : wlh1430@hot.. الخ

 

شطيط :

نطالب بصحيفة ثانية من كاتب الصكوك اللي فوق

ألف مبروك عزوزي وعقبال ما تشتري شهادة الماستر <<< يائسين منك

ابن خالتك المتبري منك ( شطيط )

 

 

حجرف راسمني قبل الوظيفة وبعد الوظيفة .. وعلى فكرة ترى القزم إللي في الزاوية مهوب ملف شقراء أبد

 

أحد الزملاء يكتب على الصحيفة .. ومدري هل هو يتهيأ لي وإلا أنه فعلاً مأخذ مقلب أنه يوقع على دفتر شيكات

 

صورة للفريان وهو يشخمط على الصحيفة بالجرم المشهود
 

بعد ذلك انتقلت الحفلة إلى مسار أخر , وهو توزيع الهدايا .. طبعاً أكيد مستغربين وش هالهدية اللي مادها لي عرق الأثلة ؟ .. أولا ً احب انوه أن الصابونه ماركة أصلية .. وثانياً , مدها لي وهو يقول : هذي الهدية عشان تغسل يدك عقب الجامعة .. وبالمرة تغسل يدك من الوظيفة

 

تم استلام الهدية وسيتم إعطائها لأقرب شغالة

 

الهدية الوردية من شطيط .. أكيد منصدمين وتقولون كيف لون وردي وهدية كيوت ومن شطيط ؟! .. أنا قلت كذا برضو وما أخفيكم بعد إني شكيت لوهلة أنه زارف الهدية من عقب نفاس أخته 

 

هنا طلع الهياط وكلن قام يمزح ويرمي جواله ومفتاحه على باله هدية.. ما درو إني ما أوفر وحطيتها كلها في مخباتي

 

الهياط كل شوي يزود لدرجة أن ملاح بغى يدخل بيتهم ويجيب مواعين المطبخ وكنبات الصالة .. وأخوه بعد ماقصر رقى للسطح عشان يفك الخزان حق المويه ويجيبه بعد .. عموماً الربطة حقت الخمسات الموجودة في الصورة حقت عيال أختي توني صارفها لهم عشان بداية الدراسة .. الله يا الدنيا يأخذون خمسة ريال كل يوم وأنا منول أبوي مستقعد لي بريالين بس .. ولو بتأخذ سندويتش من البيت يعطيك ريال واحد بس عشان العصير

 

ههههههههههههههههههههههههههههههههه الله يرجه ذا الفاصل  .. ركزوا معي يا أخوان شوي في الكرت ودوروا كلمة  ( جعله الله مولود السعادة ) <<– للحين مصمم أن الهديه عقب نفاس اخته

 

صورة وجبة العشاء , تحسونا خمسين واحد على علب ذا الببسي ذي

 

كيكة مقدمة من عرق الاثلة

 

كيكة مقدمة من عبد الرحمن السراب <<– لا زلت أقول لك دور يوزر لأخوك

 

وأخيراً هذه شهادة من أهلي بمناسبة التخرج .. والصراحة ما قهرني فيها إلا شيء واحد بس .. شمال لبنان ليه ما قاموا بالتهنئة ؟!

الراعي الماسي للحفلة :

ملاح السراب , عرق الأثلة , عبد الرحمن السراب <<– تكفى دور لأخوك يوزر , شطيط , حجرف ( فيصل سعود ) , ولاعة ( الفريان) , ملف شقراء , عبد العزيز

 

 

ضيوف الشرف :

 

صابونة لوكس , شغالتنا , وأخيراً واحد مار من جمب البيت بس مدري منهو

 

 

بطولة :

 

 السلحفاة المشردة

 

شكر خاص لعرق الأثلة لكونه قد قطع مشوار يقارب المئتين كيلو عشان الحفله .. وأي صح على الطاري تذكرت , ترى وقت الاتصال كان الساعة ثنتين الظهر ( بدري ) .. تششششيييييييييييييييييييييييييييييييييين <<– يووه اشتغلت المكنسة .. برب