السلام عليكم ورحمة الله وبركاته

كل عام وأنتم بخير .. كيفكم إن شاء الله بخير وأموركم كلها تمام ؟!

 

في الحقيقة أول مرة أرسل لكم رسالة بدون موضوع ومدري ليه أحس إني متفشل .. مهوب منكم طبعاً , لابس أحسني بطيح من عين الياهوو <<– حقير

 

عموماً مالكم بالطويلة <<– تربع

 

اليوم جاني اتصال من شخص عزيز علي يسألني فيه عن تحديث الهوت ميل والرسايل المنتشرة حول هالموضوع , على طول رديت عليه وقلت : إن كانك مصدقها فياليت تسكر السماعة وتمسح رقمي بسرعة .. قال لي : لا لا شدعوة .. اسمعني بقول لك أول وبعدها نمسح أرقام بعض لو تبي , السالفة وما فيها إني وصلتني رسالة من الهوت ميل تطلب مني تحديث البيانات , الرسالة رسمية من الشركة ومطلوب تعبئة البيانات وأنا بنفسي شيكت على الإيميل يا أبو سعود <<– دام قال أبو سعود فهو ما عنده سالفة

 

الحاصل أني مدري ليه تليقفت وقلت له ارسل لي الرسالة بشوفها .. فرأيت الطامة الكبرى .. تاتاتاتا   <<– يسمع بالتشويق
 

اضغط على الصورة لرؤيتها بحجمها الطبيعي

 

الرسالة عبارة عن شخص ذكي استغل انجراف الكثير خلف رسائل التحديث وقرر يقلد نمط رسايل الهوت ميل ويرسل رسالة وهمية بعد ما يفتح له إيميل مشابه لإيميل الشركة , مثل ما هو مشار عليه في الصورة .. أيه صح على فكرة تراني ما لقيت قلم وأضطريت أرسم السهم بالروج حق أمي .. لذا أمي  حابة تسألكم وش رأيكم في درجته ؟ <<– جحد الموضوع  

 

الحاصل يا أحبتي أن هالشخص خلى الناس كلها ترسل له بيانتهم وإيميلاتهم بالإضافة إلى الباسوردات مكرره مرتين بعد له .. وهو طويل العمر ما عليه إلا أنه يقوم ويفتح الإيميل ( أبو حرف O مكررة ) ويجلس يتنقى من بين الإيميلات اللي تجيه عاد .. أما حركة أنك تكتب الباسورد في رسالة وترسلها للهوت ميل قوووية , ذكرتني بحركات حقين المنتديات إذا بغى يحسسك أنك عضو مهم وقال لك عطني اليوزر والباسورد إللي تبي تسجل به وأنا بسجلك من لوحة التحكم .. زين لو قال لك " لوحة التحكم " بيصير متواضع ذا لأن أغلبهم يحب يهايط وبيقول " الكنترول بنل " ويقولها بنبرة حادة بعد ! <<– يا ذا الموضوع إللي كله شطحات  

 

خلاصة الموضوع , أي رسالة توصلكم بخصوص التحديث احذفوها وما جاكم علي , سواء تطلب منكم أو تحذركم عن تحديث أو غيره , ولو راح يكون فيه طلب بتغيير البيانات ما راح تكون بهذي الطريقة البدائية , راح يطلب منك تغييره بنفسك من صفحة الإعدادت الخاصة بإيميلك مهوب ترسلها لهم في رسالة وكأنك جالس تذكر أخويائك بأغراض الإستراحة إللي ناقصة   , وأي شخص وصلته هالرسالة ورد عليها وحط فيها بياناته لازم يلحق ويعدل البيانات بسرعة , عليه جرى التنوية وشكرًا

 

يرجى التوقيع هنا لإخلاء المسؤولية : ………………..  

 

* * *

أول ما شفت هالرسالة أبيت إلا أن أحذركم قبل أن أنام , لذا لو تأخرت بكرة على الدوام ياليت واحد يدرس الطلاب بدالي .. وعلى فكرة ترى فيه موضوع جديد مكتوب وجاهز .. إن شاء الله خلال هالأسبوع ينشر بالإضافة إلى مفاجآت أخرى وسحوبات جديدة في برنامجكم المعتاد ( من اللي بيجحد الدوام بكرة ؟ ) <<– لا تشرهون هذي نهاية اللي يسهر

  

برب ولا تنسون تردون علي بخصوص درجة الروج

 

*  *  *  *

تم إرساله في المجموعة البريدية بتاريخ 2 يناير 2010